రెడ్‌ క్రాస్‌ సొసైటీకి ఎన్నికలు

నిజామాబాద్‌, డిసెంబర్‌ 17

నిజామాబాద్‌ న్యూస్‌ డాట్‌ ఇన్‌ : గత కార్యవర్గపు గడువు ముగిసిన పిదప రాష్ట్ర గవర్నర్‌ సెక్రటరీ ఆదేశాల మేరకు నిజామాబాదు జిల్లా పాలనాధికారి ఎన్నికల నోటిఫికేషన్‌ విడుదల చేయబడినది. మండల స్థాయి ఎన్నికలు 20 డిసెంబర్‌ రోజున మండల కార్యాలయంలో నిర్వహించబడును, అదేవిదంగా నిజామాబాదు మున్సిపల్‌ కార్పొరేషన్‌ పరిధిలోని ఎన్నికలు జిల్లా రెడ్‌ క్రాస్‌ భవనం నందు నిర్వహించబడునని రెడ్‌ క్రాస్‌ సొసైటీ జిల్లా ఎన్నికల అధికారి సింహాచలం తెలిపారు.

డివిజన్‌ ఎన్నికలు డిసెంబర్‌ 21 న సంబంధిత ఆర్‌.డి.ఓ కార్యాలయంలో నిర్వహించబడుతాయని, జిల్లా స్థాయి కమిటీ ఎన్నికలు డిసెంబర్‌ 22న జిల్లా రెడ్‌ క్రాస్‌ భవనం నందు నిర్వహించబడుతాయని, ఎన్నికలు ఉదయం 10 గంటల నుంచి సంబంధిత కార్యాలయాలలో నిర్వహించబడుతాయన్నారు.

ఎన్నికలకు మండల స్థాయి ఎన్నికల అధికారులుగా తహసీల్దార్లు, అదనపు ఎన్నికల అధికారులుగా మండల పరిషద్‌ అభివృద్ధి అధికారులు వ్యవహరిస్తారని, డివిజన్‌ స్థాయి ఎన్నికలకు ఆర్‌.డి.ఓ ఎన్నికల అధికారిగా వ్యవహరిస్తారని, జిల్లా స్థాయి ఎన్నికలకు డిస్ట్రిక్ట్‌ కోపెరేటివ్‌ అధికారి ఎన్నికల అధికారిగా వ్యవహరిస్తారని, రెడ్‌ క్రాస్‌ సభ్యత్వం ఉన్నవారు ఎన్నికలలో పాల్గొనటానికి అర్హులు అని తెలిపారు.