సంకల్ప బలంతో శ్రమిస్తే సక్సెస్‌ మీదే

కామారెడ్డి, జూన్‌ 5

నిజామాబాద్‌ న్యూస్‌ డాట్‌ ఇన్‌ : సంకల్ప బలం,పట్టుదల తో శ్రమిస్తే విజయం చెంతకు చేరుతుందని కామారెడ్డి జిల్లా కలెక్టర్‌ జితేష్‌ వి.పాటిల్‌ అన్నారు. తెలంగాణ గ్రూప్‌ 1 ఆఫీసర్స్‌ అసోసియేషన్‌ ఆధ్వర్యంలో కామారెడ్డి కళాభారతి ఆడిటోరియంలో ఆదివారం నిర్వహించిన పోటీ పరీక్షలపై అవగాహన సదస్సుకు ముఖ్య అతిథిగా విచ్చేసిన ఆయన మాట్లాడుతూ అపజయం ఎదురైనంత మాత్రాన ప్రయత్నించడం మానకూడదని ఆత్వ విశ్వాసంతో ప్రిపేర్‌ అయ్యి ప్రభుత్వ ఉద్యోగం సాధించాలని నిరుద్యోగులకు దిశా నిర్ధేశం చేసారు.

తెలంగాణ గ్రూప్‌ 1 ఆఫీసర్స్‌ అసోసియేషన్‌ రాష్ట్ర అధ్యక్షులు మామిండ్ల చంద్రశేఖర్‌ గౌడ్‌ మాట్లాడుతూ సిలబస్‌పై పట్టు కలిగి ఉండడంతో పాటు పాత ప్రశ్నా పత్రాలను విశ్లేషించుకుంటూ, పరీక్ష విధానానికి అనుగుణంగా ప్రిపేర్‌ కావాలని సూచించారు. అనవసర సోషల్‌ మీడియాకు దూరంగా ఉండాలని, పోటీ పరీక్షల వాతావరణంలో ఏకాగ్రతతో ప్రిపేర్‌ కావాలని తెలిపారు.

అదనపు కార్యదర్శి హన్మంతు నాయక్‌ మాట్లాడుతూ పరీక్ష లో ప్రతీ ప్రశ్న కీలకమని కావున ప్రిపరేషన్‌లో నిర్లక్ష్యం వహించరాదని తెలిపారు. గ్రూప్‌ 1 అధికారి కాకర శ్రీనివాస్‌ మాట్లాడుతూ తెలంగాణ ఉద్యమ చరిత్రపై పట్టు సాధిస్తే ఎక్కువ మార్కులు స్కోర్‌ చేయవచ్చని తెలిపారు. గ్రూప్‌ 1 అధికారి శశికిరణా చారి మాట్లాడుతూ ఉద్యోగ సాధనలో ఎదురయ్యే అడ్డంకులను అధిగమిస్తూ ముందుకు పోవాలని సూచించారు. ఆర్‌టివో డాక్టర్‌ ఎన్‌ వాణి మాట్లాడుతూ మానసిక స్థైర్యం కలిగి ఉండాలని, సమయ పాలన పాటించాలని సూచించారు.

కార్యక్రమంలో గ్రూప్‌ 1 అధికారులు హన్మంతు నాయక్‌, శశికిరణా చారి, కాకర శ్రీనివాస్‌ రావు, పరశు రాము, నూతనకంటి వెంకట్‌, డాక్టర్‌ వాణి, షబ్నం, శ్రీకాంత్‌, విక్రమ్‌, జిల్లా గ్రంథాలయ సంస్థ చ్కెర్మన్‌ పున్న రాజేశ్వర్‌, శౌర్య అకాడమి డైరెక్టర్‌ నరేష్‌, రామ్‌ కుమార్‌ గౌడ్‌, బుగ్గారెడ్డి తదితరులు పాల్గొన్నారు.