మీ ఇంట్లో ఇన్నోవేటర్‌ ఉన్నారా

నిజామాబాద్‌, జూలై 18

నిజామాబాద్‌ న్యూస్‌ డాట్‌ ఇన్‌ : ఆలోచనలకు పదును పెట్టడమే కాకుండా సైన్స్‌ పై ఆసక్తి పెంచి వారిలోని సృజనాత్మకతను వెలికితీయడానికి ఇంటింటా ఎన్నోవేటర్‌ కార్యక్రమం వేదికగా నిలుస్తోంది. స్వాతంత్ర దినోత్సవ వేడుకల సందర్భంగా రాష్ట్ర ప్రభుత్వం 2022 సంవత్సరానికి ఆవిష్కరణలకు ఆన్‌లైన్‌ దరఖాస్తులను ఆహ్వానిస్తున్నది. ఇందులో ప్రధానంగా సాధారణ జీవన విధానంలో వృత్తి వ్యాపారంలో తలెత్తే సమస్యలు సవాళ్లను పరిష్కరించుకునేందుకు స్వీయ ఆలోచనలతో స్థానికంగా లభించే పరికరాలతో వస్తువులను రూపొందించడానికి ప్రయత్నించాల్సి ఉంటుంది.

ముఖ్యంగా విద్యార్థుల నుంచి మొదలు రైతులు, గృహిణులు, యువకులు ఇలా ప్రతి ఒక్కరికి అవకాశం కల్పిస్తున్నారు. ఆవిష్కర్తలు చేసిన పరికరాలకు వారే పేటెంట్‌ పొందే అవకాశం కల్పించనున్నారు. జిల్లాలోని అన్ని శాఖల అధికారులు, విద్యాసంస్థల యాజమాన్యాలు, ప్రజా ప్రతినిధులు వివిధ సంఘాలు సంస్థలు ఈ ఆవిష్కరణలు వాట్సాప్‌ నంబర్‌ 9100678543 ద్వారా పంపించే విధంగా వారి పరిధిలో ప్రయత్నించ గలరు, చింతకింది మల్లేష్‌ ఆసు యంత్రాన్ని ఆవిష్కరించిన విషయం తెలిసిందే. ఆవిష్కరణలు రూపొందించే ముందు ఇందుకు సంబంధించిన నాలుగు ఫోటోలు, ఆరు వాక్యాలు, రెండు నిమిషాలు నిడివి కలిగిన వీడియో ఆవిష్కర్త పేరు సెల్‌ ఫోన్‌ నంబరు ప్రస్తుత వృత్తి పూర్తి వివరాలు చిరునామాను 9100678543 నంబర్‌ వాట్సప్‌ ద్వారా పంపించాల్సి ఉంటుంది.

ఆసక్తి ఉన్నవారు ఆగస్టు 5వ తేదీలోగా దరఖాస్తు చేసుకోవాలి. వచ్చిన ఆవిష్కరణల అంశాల నుంచి ఉత్తమమైనవి ఎంపిక చేసి స్వాతంత్ర దినోత్సవం రోజున ప్రదర్శిస్తారు. ఇందులో పాల్గొన్న వారికి ప్రశంసా పత్రం అందజేయనున్నారు. గ్రాస్‌ రూట్‌ ఇన్నోవేటర్స్‌ను ప్రోత్సహించడం, అవకాశం కల్పించడం దీని యొక్క ప్రధాన ఉద్దేశం, అని జిల్లా సైన్స్‌ అధికారి గంగా కిషన్‌ సోమవారం ప్రజావాణిలో జిల్లా లోని అన్ని అన్ని శాఖల అధికారులకు విజ్ఞప్తి చేశారు. మరిన్ని వివరాలకు గంగా కిషన్‌ జిల్లా సైన్స్‌ అధికారిని 9848219365 సంప్రదించాలన్నారు.