ఆటోలో నుంచి పడి యువతి మృతి

ఎడపల్లి, ఏప్రిల్‌ 17

నిజామాబాద్‌ న్యూస్‌ డాట్‌ ఇన్‌ : ప్రయాణిస్తున్న ఆటోలో నుంచి పడి ఓ యువతి మృతి చెందిన ఘటన ఎడపల్లి మండలంలోని జాన్కంపేట్‌ గ్రామ శివారులో అశోక్‌ సాగర్‌ వద్ద సోమవారం చోటు చేసుకొంది. వివరాలిలా ఉన్నాయి.

నవీపేట్‌ కు చెందిన పోచమ్మల మైసమ్మ (17) యువతి నిజామాబాదు పట్టణానికి వెళ్లేందుకు ఆటోలో ఎక్కింది. ఆటో జాన్కంపేట్‌ శివారులోని అశోక్‌ సాగర్‌ వద్దకు చేరుకోగానే వేగంగా వెళుతున్న ఆటోలో నుంచి ప్రమాదవశాత్తు మైసమ్మ రోడ్డుపై కిందపడిపోయింది. దీంతో తలకు తీవ్ర గాయమై రక్త స్రావం జరిగి అక్కడిక్కడే మృతి చెందింది. ఆటోలో నుంచి యువతి ప్రమాదవ శాత్తు పడిపోయినా ఆటో మాత్రం నిలపలేదని ప్రత్యక్ష సాక్షులు తెలిపారు.

ఘటన సమాచారం అందుకొన్న పోలీసులు సంఘటన స్థలానికి చేరుకొని శవపంచనామా నిర్వహించారు. పోస్టుమార్టం నిమిత్తం శవాన్ని నిజామాబాదు జిల్లా ఆసుపత్రి కి తరలించారు. ప్రమాద సమాచారం అందుకొన్న కుటుంబ సభ్యులు సంఘటన స్థలానికి చేరుకొని ఘటనను చూసి రోదించిన దృశ్యం అందరిని కలచివేసింది.