ఖిల్లా జూనియర్‌ కళాశాలలో రిక్రూట్‌ మెంట్‌ డ్రైవ్‌

నిజామాబాద్‌, జూలై 24

నిజామాబాద్‌ న్యూస్‌ డాట్‌ ఇన్‌ : హైదరాబాద్లోని ఎంఎస్‌ఎన్‌ లాబొరేటరీస్‌ ప్రైవేట్‌ లిమిటెడ్‌ కంపెనీలో టెక్నికల్‌ ట్రైని ఉద్యోగాల భర్తీ కోసం రిక్రూట్మెంట్‌ డ్రైవ్‌ ఏర్పాటు చేశామని డిఐఈఓ రఘురాజ్‌ ఒక ప్రకటనలో తెలిపారు. నిజామాబాద్‌ ఖిల్లా జూనియర్‌ కళాశాలలో మంగళవారం ఉదయం రిక్రూట్మెంట్‌ డ్రైవ్‌ జరుగుతుందని అన్నారు. 2022, 2023 సంవత్సరాలలో ఇంటర్మీడియట్‌ ఎంపీసీ బైపీసీ ఫార్మా టెక్‌ కోర్సులలో ఉత్తీర్ణులైన అభ్యర్థులు నేరుగా రిక్రూట్మెంట్‌ డ్రైవ్‌ కు హాజరు కావచ్చని సూచించారు.

అభ్యర్థులు పదవ తరగతిలో 60 శాతం మార్కులు, ఇంటర్మీడియట్లో 50 శాతం మార్కులు సాధించి ఓకే విడతలో ఉత్తీర్ణులై ఉండాలన్నారు. 20 సంవత్సరాల లోపు వయస్సు కలిగిన స్త్రీ పురుష అభ్యర్థులు అర్హులని పేర్కొన్నారు. ఎంపికైన అభ్యర్థులకు మొదటి రెండు సంవత్సరాలు ఉచిత వసతితో పాటు సబ్సిడీ క్యాంటీన్‌ సౌకర్యాన్ని వర్తింపజేస్తూ నెలకు 11వేల రూపాయల వేతనం చెల్లిస్తారని వివరించారు.

అలాగే కంపెనీ ద్వారా గుర్తింపు పొందిన యూనివర్సిటీ నుండి బీ.ఎస్సీ డిగ్రీ చేసే వెసులుబాటు కల్పిస్తోందని అన్నారు. అర్హులైన అభ్యర్థులు ఒరిజినల్‌ ఎస్‌ఎస్‌సి, ఇంటర్‌ మెమోలు, ఆధార్‌కార్డుతో పాటు రెండు జతల జిరాక్స్‌ ప్రతులతో మంగళవారం ఉదయం 11 గంటలకు రిక్రూట్మెంట్‌ డ్రైవ్‌ కు హాజరుకావాలని డిఐఈఓ సూచించారు. అభ్యర్థులు ఈ అవకాశాన్ని సద్వినియోగం చేసుకోవాలని కోరారు. పూర్తి సమాచారం కోసం సెల్‌: 9182063878, 7995549496 సంప్రదించాలని సూచించారు.