దరఖాస్తుల విచారణ మిషన్‌ మోడ్‌లో పూర్తిచేయాలి…

కామారెడ్డి, అక్టోబర్‌ 21

నిజామాబాద్‌ న్యూస్‌ డాట్‌ ఇన్‌ :

జిల్లాల్లో ఓటర్‌ జాబితా సవరణ 2024-25 సంబంధించి ప్రణాళికాబద్ధంగా స్వీప్‌ కార్యక్రమాలు నిర్వహించాలని రాష్ట్ర ముఖ్య ఎన్నికల అధికారి సుదర్శన్‌ రెడ్డి అన్నారు.

సోమవారం హైదరాబాద్‌ నుండి రాష్ట్ర ముఖ్య ఎన్నికల అధికారి సుదర్శన్‌ రెడ్డి గ్రాడ్యుయేట్‌, టీచర్స్‌ ఎమ్మెల్సీ స్థానాల ఓటరు రూపకల్పనపై జిల్లాల కలెక్టర్‌లకు వీడియో సమావేశం ద్వారా శిక్షణ అందించారు. సమీకృత జిల్లాల సముదాయం కామారెడ్డి నుండి జిల్లా కలెక్టర్‌, ఆర్డీఓ, సిబ్బంది పాల్గొన్నారు.

వీడియో కాన్ఫరెన్స్‌లో రాష్ట్ర ముఖ్య ఎన్నికల అధికారి మాట్లాడుతూ, ఎమ్మెల్సీ ఓటర్ల నమోదుకు వస్తున్న దరఖాస్తుల విచారణ మిషన్‌ మోడ్‌లో పూర్తి చేయాలని అన్నారు. ఉమ్మడి మెదక్‌- నిజామాబాద్‌- అదిలాబాద్‌- కరీంనగర్‌ జిల్లాల పట్టభద్రుల స్థానానికి లక్ష దరఖాస్తులు, టీచర్ల స్థానానికి 2046 దరఖాస్తులు రాగా, 7 వేల పట్టభద్రుల దరఖాస్తులు మాత్రమే విచారణ పూర్తి అయ్యాయని, వరంగల్‌- ఖమ్మం -నల్గొండ జిల్లాలో ఉపాధ్యాయుల స్థానానికి 2730 దరఖాస్తులు రాగా అన్ని పెండిరగ్‌ ఉన్నాయని అన్నారు.

పెండిరగ్‌ ఎమ్మెల్సీ స్థానాల ఓటర్‌ నమోదు దరఖాస్తులను యుద్ధప్రాతిపదికన పూర్తి చేయాలని కలెక్టర్‌లను ఆదేశించారు. ప్రస్తుతం ఖాళీగా ఉన్న ఎమ్మెల్సీ స్థానాల ఎన్నికలలో పాల్గొనేందుకు అర్హులైన ఓటర్లు తమ పేర్లను ఓటరు జాబితాలో నవంబర్‌ 6 లోపు నమోదు చేయాలని అన్నారు.

ఓటర్‌ జాబితా సవరణ 2024-25 కోసం స్వీప్‌ కార్యక్రమాలు పక్కాగా చేపట్టాలని, దీని కోసం ప్రత్యేకంగా నోడల్‌ అధికారులు నియమించాలని అన్నారు. జనవరి 1, 2025 నాటికి 18 సంవత్సరాలు నిండే ప్రతి ఒక్కరికి తప్పనిసరిగా ఓటు హక్కు కల్పించాలని అన్నారు. యువ ఓటర్ల నమోదుతో పాటు దివ్యాంగులు, థర్డ్‌ జెండర్‌, సెక్స్‌ వర్కర్స్‌ మొదలగు వర్గాలు, ఆదివాసీ, గిరిజనుల ఓటర్ల నమోదు ప్రత్యేక దృష్టి సారించాలని అన్నారు.

ఓటర్‌ జాబితా రూపకల్పనపై రాజకీయ పార్టీల ప్రతినిధులతో సమన్వయం చేసుకోవాలని, ఏ ఒక్కరిని వదల కుండా ప్రతీ ఒక్కరికీ ఓటు హక్కు కల్పించాలని అన్నారు. అక్టోబర్‌ 29న డ్రాఫ్ట్‌ ఓటర్‌ జాబితా విడుదల చేయడం జరుగుతుందని, దీనిపై అభ్యంతరాలను, నూతన ఓటర్‌ నమోదు దరఖాస్తులను నవంబర్‌ 29 వరకు స్వీకరిస్తామని, డిసెంబర్‌ 26 వరకు అభ్యంతరాలను పరిష్కరించి జనవరి 6న తుది ఓటర్‌ జాబితా ప్రచురించాలని తెలిపారు.

వీడియో కాన్ఫరెన్స్‌ అనంతరం జిల్లా కలెక్టర్‌ ఆశిష్‌ సాంగ్వాన్‌ మాట్లాడుతూ, 1-1-2025 నాటికి 18 ఏళ్లు నిండే ప్రతీ ఒక్కరి పేరును ఓటరు జాబితాలో ఎన్రోల్మెంట్‌ లను వేగవంతం చేయాలని అన్నారు. అలాగే గ్రాడ్యుయేట్‌, టీచర్స్‌ ఎన్రోల్మెంట్‌ కూడా వేగవంతం చేయాలని అన్నారు. స్వీప్‌ కార్యక్రమాల నిర్వహణకు ప్రణాళికలను సిద్ధం చేయాలని తెలిపారు. వీడియో కాన్ఫరెన్స్‌లో కామారెడ్డి ఆర్డీఓ రంగనాథ్‌ రావు, జిల్లా గ్రామీణాభివృద్ధి అధికారి, స్వీప్‌ నోడల్‌ అధికారి సురేందర్‌, తహసీల్దార్లు, ఎన్నికల విభాగం సిబ్బంది పాల్గొన్నారు.