గల్ఫ్‌ ఎక్స్‌ గ్రేషియా మంజూరి పత్రం అందజేసిన మంత్రి

హైదరాబాద్‌, అక్టోబర్‌ 30

నిజామాబాద్‌ న్యూస్‌ డాట్‌ ఇన్‌ :

సౌదీ అరేబియాలో మృతి చెందిన కరీంనగర్‌ జిల్లా చొప్పదండి మండలం భూపాలపట్నం గ్రామానికి చెందిన పులి అంజయ్య కుటుంబానికి మంగళవారం రూ.5 లక్షల గల్ఫ్‌ ఎక్స్‌ గ్రేషియా మంజూరి పత్రం (ప్రొసీడిరగ్స్‌) ను మంత్రి పొన్నం ప్రభాకర్‌, కరీంనగర్‌ జిల్లా కలెక్టర్‌ పమేలా సత్పతి ఒక కార్యక్రమంలో అందజేశారు. చొప్పదండి ఎమ్మెల్యే మేడిపల్లి సత్యం మానకొండూర్‌ ఎమ్మెల్యే కవ్వంపల్లి సత్యనారాయణ తదితరులు ఈ కార్యక్రమంలో పాల్గొన్నారు.

ఈ సందర్బంగా మంత్రి పొన్నం ప్రభాకర్‌ మాట్లాడుతూ గల్ఫ్‌ మృతుల కుటుంబాలను ఆదుకోవడానికి రూ.5 లక్షల ఎక్స్‌ గ్రేషియా (మృతధన సహాయం) ఇవ్వడం దేశ చరిత్రలోనే ప్రథమం అని అన్నారు. గల్ఫ్‌ కార్మికులు, ఎన్నారైలు తమ సమస్యలు విన్నవించుకోవడానికి హైదరాబాద్‌ ప్రజాభవన్‌లో ‘ప్రవాసీ ప్రజావాణి’ కౌంటర్‌ ఏర్పాటు చేశామని, గల్ఫ్‌ కార్మికుల సమస్యలు అధ్యయనం చేసి ప్రభుత్వానికి సూచనలు చేయడానికి త్వరలో అడ్వయిజరీ కమిటీ ఏర్పాటు చేస్తామని మంత్రి చెప్పారు.

కాంగ్రేస్‌ ఎలక్షన్‌ మేనిఫెస్టోలో ఇచ్చిన హామీ ప్రకారం ‘గల్ఫ్‌ గ్యారంటీ’ ని అమలు చేసిన ముఖ్యమంత్రి ఏ. రేవంత్‌ రెడ్డికి, టీపీసీసీ అధ్యక్షులు బి. మహేశ్‌ కుమార్‌ గౌడ్‌ కు, మంత్రివర్గానికి, ఎమ్మెల్యేలు, ఎమ్మెల్సీలు, నాయకులు అందరికీ కాంగ్రేస్‌ ఎన్నారై సెల్‌ కన్వీనర్‌ మంద భీంరెడ్డి ఒక ప్రకటనలో కృతజ్ఞతలు తెలిపారు.