ఎన్నికల సామాగ్రి సిద్దంగా ఉంచాలి..

కామారెడ్డి, జనవరి 27

నిజామాబాద్‌ న్యూస్‌ డాట్‌ ఇన్‌ :

రానున్న పంచాయతీ ఎన్నికల నేపథ్యంలో ఎన్నికల సామాగ్రి సిద్ధంగా ఉంచాలని జిల్లా కలెక్టర్‌ ఆశిష్‌ సాంగ్వాన్‌ అన్నారు. సోమవారం సాయంత్రం జిల్లా ఎస్పీ కార్యాలయం సమీపంలోని గోదాము లోని పంచాయతీ ఎన్నికల నిర్వహణకు ఉపయోగించే సామాగ్రిని, బ్యాలెట్‌ బాక్స్‌ లను కలెక్టర్‌ పరిశీలించారు.

ఈ సందర్భంగా కలెక్టర్‌ మాట్లాడుతూ, రాష్ట్ర ఎన్నికల సంఘం నుండి సరఫరా అయిన పంచాయతీ ఎన్నికలకు వినియోగించే కవర్లు, వివిధ రకాల ఫారాలు, బ్యాలెట్‌ బాక్స్‌ లు, ఇతర సామాగ్రిని భద్రంగా ఉంచాలని, మండలాల వారీగా సరఫరా చేయుటకు సిద్ధం చేయాలనీ తెలిపారు.

అదేవిధంగా బ్యాలెట్‌ బాక్స్‌ లకు పెయింటింగ్‌ వేయించాలని, అవసరం అయితే మరమ్మతులు చేయించాలని సూచించారు. కార్యక్రమంలో జిల్లా పంచాయతీ అధికారి శ్రీనివాస్‌ రావు, పంచాయతీ ఉద్యోగులు పాల్గొన్నారు.