దేశం కుదుట పడుతోంది..

ప్రధాని నరేంద్ర మోడి….

లాక్ డౌన్ అనంతరం దేశం ఇప్పుడు సాదారణ స్థాయికి చేరుకుంటుందని ప్రధాని నరేంద్ర మోడి అన్నారు. వాణిజ్య ఆవసరాల కోసం బొగ్గు బ్లాకుల వేలం ను ప్రధాని నేడు (జూన్ 18) వీడియో కాన్ఫరెన్స్ ప్రారంభించారు.

ఆత్మ నిర్భర్ భారత్ అభియాన్ ఆధ్వర్యంలో భాగంగా బొగ్గు గనుల శాఖ సహాకారంతో ఫిక్కీ ఆధ్వర్యంలో బొగ్గు గనుల కోసం ఈ వేలం ప్రక్రియను ప్రారంభించారు.

కరోనావైరస్ వ్యాప్తిని అరికట్టడానికి విధించిన దీర్ఘకాలిక లాక్డౌన్ పారిశ్రామిక ఉత్పత్తి, వినియోగదారుల వ్యయానికి తీవ్ర అంతరాయం కలిగించిందని, జి.డి.పి వృద్ధి అంచనా గణనీయంగా తగ్గిందని ప్రధాని అన్నారు. వాణిజ్య కార్యక్రమాలు వేగంగా పుంజుకుంటున్నాయని ఆయన అన్నారు.

దేశంలో విద్యుత్ డిమాండ్ పెరగడం, ఇంధన వినియోగం దేశం పూర్వ స్థితికి చేరుకుందనడానికి నిదర్శన మని ఆయన అన్నారు

కరోనా మహమ్మారిని భారత్ అధిగమిస్తుందని, దేశం ఈ సంక్షోభాన్ని అవకాశంగా మార్చుకుంటుదని అన్నారు. ఈ సంక్షోభం భారతదేశానికి ఆత్మనిర్భర్ అనే పాఠాన్ని నేర్పించిందని అన్నారు. ఆత్మ నిర్భర్ భారత్ అంటే దిగుమతులపై ఆధారపడటాన్ని తగ్గించడం, దిగుమతులపై విదేశీ కరెన్సీని ఆదా చేయడం అని ఆయన అన్నారు. దేశం దిగుమతులపై ఆధారపడనవసరం లేకుండా దేశీయంగా వనరులను అభివృద్ధి చేయాలని ఇది సూచిస్తుంది. దీని అర్థం మనం ఇప్పుడు దిగుమతి చేసుకునే వస్తువుల యొక్క అతిపెద్ద ఎగుమతిదారులుగా మారడమని మోడి చెప్పారు.

ఆత్మనిర్భర్ భారత్ ను సాధించడానికి ప్రతి రంగాన్ని, ప్రతి ఉత్పత్తిని, ప్రతి సేవను దృష్టిలో పెట్టుకుని, సమగ్రంగా పనిచేయాలని ప్రధాని సూచించారు, ఈ రోజు తీసుకున్న ఒక పెద్ద అడుగు ఇంధన రంగంలో భారతదేశాన్ని స్వావలంబన చేస్తుంది. ఈ సంఘటన ఒక బొగ్గు మైనింగ్ రంగానికి సంబంధించిన సంస్కరణల అమలును మాత్రమే కాకుండా, యువతకు లక్షలాది ఉపాధి అవకాశాలకు నాంది పలికిందని ఆయన అన్నారు. ఈ రోజు మనం వాణిజ్య బొగ్గు మైనింగ్ వేలం ప్రారంభించడమే కాకుండా బొగ్గు రంగాన్ని దశాబ్దాల లాక్డౌన్ నుండి విముక్తి చేస్తున్నామని ఆయన అన్నారు.

ప్రపంచంలోని నాల్గవ అతిపెద్ద బొగ్గు నిల్వతో మరియు రెండవ అతిపెద్ద ఉత్పత్తిదారుగా ఉన్న భారతదేశం రెండవ అతిపెద్ద బొగ్గు దిగుమతిదారు అని వ్యంగ్యాన్ని ఆయన నొక్కి చెప్పారు. ఈ పరిస్థితి దశాబ్దాలుగా కొనసాగుతోందని, బొగ్గు రంగాన్ని క్యాప్టివ్, నాన్ క్యాప్టివ్ గనుల వల‌లో చిక్కుకున్నారని ఆయన అన్నారు.

బొగ్గు రంగానికి ఉత్సాహాన్నిచ్చేలా 2014 లో బొగ్గు అనుసంధానం ప్రవేశపెట్టిందని ప్రధాని చెప్పారు. పెరిగిన పోటీ, మూలధనం, పాల్గొనడం మరియు సాంకేతిక పరిజ్ఞానం కోసం బొగ్గు, మైనింగ్ రంగాన్ని పూర్తిగా తెరవడానికి భారత్ ప్రధాన నిర్ణయం తీసుకుందని ఆయన అన్నారు. ప్రైవేటు మైనింగ్ రంగంలో కొత్త వాళ్లు ఆర్థిక సమస్యను ఎదుర్కోకుండా జాగ్రత్తలు తీసుకున్నారు.

ఈ సంస్కరణల తరువాత బొగ్గు ఉత్పత్తి, మొత్తం బొగ్గు రంగం స్వావలంబన సాధిస్తాయని ప్రధాని అన్నారు. ఇప్పుడు బొగ్గు కోసం మార్కెట్ తెరిచాం, కాబట్టి, ఏ రంగమైనా వారి అవసరాలకు అనుగుణంగా బొగ్గును కొనుగోలు చేయవచ్చు. ఈ సంస్కరణలు బొగ్గు రంగానికి మాత్రమే కాకుండా స్టీల్, అల్యూమినియం, ఎరువులు, సిమెంట్ వంటి ఇతర రంగాలకు కూడా ప్రయోజనం చేకూరుస్తాయని ప్రధాని చెప్పారు. ఇది విద్యుత్ ఉత్పత్తిని పెంచడంలో కూడా సహాయపడుతుంది.

ఇనుము, బాక్సైట్ మరియు ఇతర ఖనిజాలు వంటి ఖనిజాలు బొగ్గు నిల్వలకు చాలా దగ్గరగా ఉన్నందున ఖనిజ రంగంలో సంస్కరణలకు బొగ్గు మైనింగ్ సంస్కరణల నుండి బలం లభించిందని పిఎం చెప్పారు. దీని ద్వారా రాష్ట్ర ప్రభుత్వాలకు ఎక్కువ ఆదాయం లభిస్తుందని దేశంలో ఎక్కువ మందికి ఉపాధి లభిస్తుందని ప్రధాన మంత్రి అన్నారు. ఇది ప్రతి రంగంపై సానుకూల ప్రభావం చూపుతుందని చెప్పారు.

ఇదే సమయంలో పర్యావరణ పరిరక్షణ మీద కూడా ద్రుష్టి పెట్టాలని నరేంద్రమోడి అన్నారు. బొగ్గు నుంచి వాయువును తయారు చేయడానికి ప్రస్తుతం ఉన్న సాంకేతిక పరిజ్ఘానాన్ని వాడుకోవాలన్నారు. 2030 నాటికి 100 మిలియన్ టన్నుల బొగ్గును గ్యాస్ రూపంలోకి మార్చి వాడుకొవాలని చెప్పారు. ఈ విధంగా చేయడం వల్ల పర్యా వరణానికి ముప్పు తగ్గుతుందని ప్రధాని అన్నారు.

ఈ బొగ్గు రంగ సంస్కరణలతో తూర్పు మరియు మధ్య భారతదేశాన్ని, గిరిజన ప్రాంతాలు అభివృద్ధి చెందుతాయని ప్రధాని అన్నారు.

వాణిజ్య మైనింగ్ వల్ల తూర్పు, మధ్య భారతదేశ స్థానిక ప్రజలకు వారి ఇళ్ల దగ్గర ఉపాధి దొరుకుతుందని ప్రధాని అన్నారు. బొగ్గు వెలికితీత, రవాణా కోసం మౌలిక సదుపాయాల కల్పన కోసం 50 వేల కోట్ల రూపాయలు ఖర్చు చేయాలని ప్రభుత్వం నిర్ణయం తీసుకుందని, ఇది ఉపాధి అవకాశాలను కూడా సృష్టిస్తుందని ఆయన అన్నారు.

గతంలో ఎన్నో సంక్షోభాలు చూసిన భారత్ కోవిడ్ నుండి భారతదేశం బయటకు వస్తుందని ప్రధాని ఆకాంక్షించారు. భారతదేశం ఆత్మనిర్భర్‌గా మారగలదని, భారతదేశ విజయం, వృద్ధి ఖచ్చితంగా ఉందని విశ్వాసం వ్యక్తం చేశారు. కొన్ని వారాల క్రితం ఎన్-95 మాస్క్ లు , కరోనా టెస్టింగ్ కిట్లు, పిపిఇ లు,వెంటిలేటర్లను దిగుమతి చేసుకునే వారమని ఇప్పుడు ఇక్కడ సరిపడా తయారు చేసుకుంటున్నామని చెప్పారు.