పిచ్చికుక్క దాడిలో ముగ్గురికి గాయాలు

ఎడపల్లి, సెప్టెంబర్‌ 24

నిజామాబాద్‌ న్యూస్‌ డాట్‌ ఇన్‌ : పిచ్చి కుక్క దాడిలో ఓ మహిళతో పాటు 5 ఏండ్ల పాపకు, సంవత్సరంన్నర ఓ బాలునికి తీవ్ర గాయాలైన ఘటన ఎడపల్లి మండలంలోని జానకంపేట్‌ గ్రామంలో చోటుచేసుకోంది. వివరాలిలా ఉన్నాయి. జానకంపెట్‌ గ్రామానికి చెందిన బ్యాగరి సంపత్‌ భార్య సుజాత ఇంటివద్ద ఊడ్చే క్రమంలో పిచ్చికుక్క దాడి చేసి గాయపర్చింది. అంతేకాదు వారి ఏడాదిన్నర కుమారుడు ఇంట్లో గేటులోపల ఆడుకొంటుండగా ఆ పిచ్చి కుక్క దాడి చేసి తీవ్ర గాయాల పాలు చేసింది.

అక్కడినుంచి పారిపోయిన పిచ్చికుక్క అదే కాలనీలో ఇంటిబయట ఆడుకొంటున్న 5 సంవత్సరాల అన్వికనూ గాయపర్చింది. దీంతో తీవ్ర గాయాలపాలైన బాలుణ్ణి బాలికను, ఆ మహిళను కుటుంబీకులు నిజామాబాద్‌ గవర్నమెంట్‌ ఆసుపత్రికి తరలించారు. దాడికి పాల్పడిన పిచ్చికుక్కను కాలనీవాసులు చంపేశారు. గ్రామంలో కుక్కల బెడద ఎక్కువైందని పెద్దలపైనే కాకుండా చిన్నపిల్లల పై దాడికి పాల్పడుతున్నాయని కాలనీ వాసులు పేర్కొంటున్నారు.

గ్రామ పంచాయతీ చర్యలు తీసుకోవాలని కోరారు. ఇటీవల పోచారం గ్రామంలో పిచ్చికుక్కలు ఎక్కువై గ్రామంలో అలజడులు సృష్టిస్తున్నాయని గ్రామస్తులు కుక్కలను సంహరించారు. పిచ్చికుక్కల బెడద నుంచి కాపాడుకొనేందుకు పోచారంలో గ్రామస్తులు అనుసరించిన చర్యలను జానకంపేట్‌ గ్రామంలో చేపట్టాలని గ్రామస్తులు కోరుతున్నారు.