నవీపేట్‌లో ఘోర రోడ్డు ప్రమాదం

నవీపేట్‌, నవంబర్‌ 16

నిజామాబాద్‌ న్యూస్‌ డాట్‌ ఇన్‌ : నవీపేట్‌ మండల కేంద్రంలోని చెక్‌ పోస్ట్‌ సమీపంలో నిజామాబాద్‌ నుండి వస్తున్న లారీ ఢీకొని ఇద్దరు విద్యార్థులు మృతి చెందారు. వీరితో పాటు ఇద్దరు వీఆర్‌ఏలకు తీవ్ర సైతం గాయాలయ్యాయి.

స్థానికులు తెలిపిన వివరాల ప్రకారం మండల కేంద్రంలోని సుభాష్‌ నగర్‌లో నివాసముంటున్న ఉదయ్‌ (14), సాయి తేజ (14) లు 9వ తరగతి చదువుతున్నారు. ఇద్దరు కలిసి మోటార్‌ బైక్‌పై నవీపేట్‌కు వస్తుండగా వెనుక వైపు నుండి వేగంగా వస్తున్న లారీ ఢీకొనడంతో ఇద్దరు విద్యార్థులు అక్కడికక్కడే మృతి చెందారు. ముందు నుండి వస్తున్న మహంతంకు చెందిన ఇద్దరు వీఆర్‌ఏలు గోపాల్‌, సాయిలు లను సైతం కంగారులో ఢీకొనడంతో ఇద్దరికీ తీవ్ర గాయాలయ్యాయి.

ఘోర రోడ్డు ప్రమాదంలో విద్యార్థులు మృతి చెందడంతో గ్రామంలో విషాద ఛాయలు నెలకొన్నాయి. ప్రమాదం చేసి తప్పించుకునేందుకు ప్రయత్నించిన లారీని యంచ సర్పంచ్‌ ప్రవీణ్‌ కుమార్‌ యంచ చెక్పోస్ట్‌ వద్ద పట్టుకొని పోలీస్‌ స్టేషన్‌కు పంపించారు. ప్రమాదంలో మృతి చెందిన సాయితేజ యంచ గ్రామ పంచాయతీ కార్యదర్శి సుధారాణి కుమారుడు, ఇటీవలే వికారాబాద్‌ తాండూరు నుండి బదిలీపై రాగా ప్రమాదంలో మృతి చెందడంతో గ్రామస్థులు తీవ్ర విచారం వ్యక్తం చేశారు.