గల్లంతయిన యువకుడు మృతి

రెంజల్‌, జనవరి 2

నిజామాబాద్‌ న్యూస్‌ డాట్‌ ఇన్‌ : రెంజల్‌ మండలంలోని తాడ్‌ బిలోలి గ్రామానికి చెందిన మిద్దె నరేష్‌ (34) అనే యువకుడు గత శనివారం గోదావరి నదిలో చాపల వేటకు వెళ్ళాడు. చేపలు పట్టే క్రమంలో తెప్పపై నుంచి ప్రమాదవశాత్తు నీటిలో జారిపడడంతో స్థానికులు కుటుంబ సభ్యులకు సమాచారం అందజేశారు. కుటుంబ సభ్యులు ఘటన స్థలానికి చేరుకుని గాలింపు చర్యలు చేపట్టారు.

ఎంత వెతికినా మృతదేహం ఆచూకీ లభ్యం కాలేదు, కాగా సోమవారం ఉదయం నదివైపునకు వెళ్లిన గ్రామస్థులకు నదిలో తేలియాడుతున్న మృతదేహం కనిపించడంతో పోలీసులకు సమాచారం అందించారు. ఘటన స్థలానికి చేరుకున్న పోలీసులు మృతదేహాన్ని జాలర్ల సహాయంతో బయటకు తీయించారు. మృతుడి తండ్రి సాయిలు పిర్యాదు మేరకు కేసు నమోదు చేసుకుని పోస్టుమార్టం నిమిత్తం బోధన్‌ ఏరియా ఆసుపత్రికి తరలించినట్లు ఎస్సై సాయన్న తెలిపారు. మృతుడికి భార్య స్వప్న, ఇద్దరు కుమారులు ఉన్నారు.