గల్ఫ్‌లో ఉన్న రైతులకు రైతు బీమా వర్తింపజేయాలి

నిజామాబాద్‌, జూలై 17

నిజామాబాద్‌ న్యూస్‌ డాట్‌ ఇన్‌ : పొట్ట చేతపట్టుకుని గల్ఫ్‌ దేశాలకు వలస వెళ్లిన సన్నకారు, చిన్నకారు రైతులకు రైతుబీమా వర్తింపజేయాలని, రేషన్‌ కార్డుల్లో పేరు లేనందున బీసీ చేతివృత్తుల లక్ష సాయం పథకానికి గల్ఫ్‌ రిటనీలు దరఖాస్తు చేసుకోలేకపోయారని, రేషన్‌ కార్డుల నుండి గల్ఫ్‌కార్మికుల పేర్లు తొలగించడం వలన ఆరోగ్యశ్రీ తదితర ప్రభుత్వ సంక్షేమ పథకాలు అందడం లేదని టిపిసిసి గల్ఫ్‌ ఎన్నారై కన్వీనర్‌ సింగిరెడ్డి నరేష్‌ రెడ్డి అన్నారు. సోమవారం హైదరాబాద్‌లోని కాంగ్రెస్‌ పార్టీ రాష్ట్ర కార్యాలయం గాంధీ భవన్‌లో విలేఖరుల సమావేశంలోమాట్లాడారు.

కార్యక్రమంలో టిపిసిసి ఎన్నారై సెల్‌ చైర్మన్‌ డా. బి. ఎం. వినోద్‌ కుమార్‌, ఎన్నారైలు గంప వేణుగోపాల్‌, రాజశేఖర్‌ రెడ్డి, రాఘవేందర్‌, విష్ణువర్ధన్‌, గాల్‌ రెడ్డి, చాంద్‌ పాషా పాల్గొన్నారు.

ఉత్తర తెలంగాణ ప్రాంతం నుండి గత 52 సంవత్సరాలుగా (1970 నుంచి) గల్ఫ్‌ దేశాలకు వలసలు కొనసాగుతున్నాయని, గల్ఫ్‌ కార్మికుల సమస్యలను కేంద్ర, రాష్ట్ర, ప్రభుత్వాలు పట్టించుకోవడం లేదని, నీళ్లు – నిధులు – నియామకాలు, బొగ్గుబాయి – బొంబాయి – దుబాయి… అనే నినాదాలతో అధికారంలోకి వచ్చిన బీఆర్‌ఎస్‌ అధినేత కేసీఆర్‌ గల్ఫ్‌ కార్మికుల సంక్షేమాన్ని గాలికి వదిలేశారన్నారు. తెలంగాణ రాష్ట్రానికి చెందిన సుమారు 15 లక్షల మంది గల్ఫ్‌ దేశాలైన సౌదీ అరేబియా, యూఏఈ, ఓమన్‌, ఖతర్‌, కువైట్‌, బహ్రెయిన్‌ దేశాలతో పాటు మలేషియా, సింగపూర్‌, అఫ్గానిస్తాన్‌, ఇరాక్‌, లిబియా తదితర దేశాలకు ఉపాధి కోసం వలస వెళ్లారని, వీరందరి సంక్షేమం కోసం సమగ్ర ఎన్నారై పాలసీలో భాగంగా ‘గల్ఫ్‌ కార్మికుల సంక్షేమ బోర్డు’ ఏర్పాటు చేయాలన్నారు.

గల్ఫ్‌ కార్మికుల సంక్షేమానికి రూ. 500 కోట్ల వార్షిక బడ్జెట్‌ కేటాయించాలని, గల్ఫ్‌ మృతుల కుటుంబాలను ఆదుకోవడానికి రూ. 5 లక్షల ఎక్స్‌ గ్రేషియా చెల్లించాలన్నారు. అన్ని విద్యా సంస్థలలో గల్ఫ్‌ కార్మికుల పిల్లలకు 5 శాతం రిజర్వేషన్‌ కల్పించాలని పేర్కొన్నారు. జీవిత బీమా, ప్రమాద బీమా, ఆరోగ్య బీమా, పెన్షన్‌ లతో కూడిన సమగ్రమైన సాంఘిక భద్రత (సోషల్‌ సెక్యూరిటీ) పథకం ప్రవేశ పెట్టాలని, హైదరాబాద్‌ లో సౌదీ అరేబియా, కువైట్‌ దేశాల కాన్సులేట్‌ లు (రాయబార కార్యాలయాలు) ఏర్పాటు అయ్యేలా కేంద్ర ప్రభుత్వం చొరవ తీసుకోవాలన్నారు.

ప్రవాస భారతీయ బీమా యోజన అనే రూ.10 లక్షల విలువైన ప్రమాద బీమా పథకంలో సహజ మరణంను కూడా చేర్చాలని, రూ.325 చెల్లిస్తే రెండు సంవత్సరాల కాలపరిమితితో ఇన్సూరెన్స్‌ ఇస్తారని, పాస్‌ పోర్ట్‌ స్టేటస్‌ తో సంబంధం లేకుండా గల్ఫ్‌ దేశాలకు వెళ్లే ప్రతి ఒక్కరికీ ఈ ఇన్సూరెన్స్‌ పథకం వర్తింపజేయాలన్నారు. విదేశీ వ్యవహారాల మంత్రిత్వ శాఖ పరిధిలోని ఈ అంశంపై కేంద్ర ప్రభుత్వం చొరవ తీసుకోవాలని డిమాండ్‌ చేశారు. ఎమిగ్రేషన్‌ యాక్టు-1983 ప్రకారం… గల్ఫ్‌ దేశాలకు ఉద్యోగానికి వెళ్ళడానికి సర్వీస్‌ చార్జీగా అభ్యర్థి యొక్క 45 రోజుల వేతనం (రూ. 30 వేలకు మించకుండా) మాత్రమే ఏజెంటుకు చెల్లించాలని, దీనిపై 18 శాతం జీఎస్టీ అనగా రూ.5,400 చెల్లించాల్సి ఉంటుందని, కేంద్ర ప్రభుత్వం జీఎస్టీని పూర్తిగా రద్దు చేయాలన్నారు.

ఎన్నారైలు తమ అమూల్యమైన ఓటు హక్కును ఆన్‌లైన్‌ ద్వారా వినియోగించుకునేలా తక్షణమే చర్యలు వేగవంతం చేయాలని, విదేశాల నుండి వాపస్‌ వచ్చిన వారిని ఆదుకోవడానికి కార్మికుల నైపుణ్యం మరియు అనుభవాన్ని ఉపయోగించుకొని కేంద్ర, రాష్ట్ర ప్రభుత్వలు సబ్సిడీతో కూడిన రుణాలు ఇచ్చి స్థానికంగా ఉపాధి అవకాశాలు కల్పించాలన్నారు. వాపస్‌ వచ్చినవారు జీవితంలో స్థిరపడటానికి పునరావాసం, పునరేకీకరణ కొరకు ప్రత్యేక పథకాల రూపకల్పన చేయాలన్నారు. జైళ్లలో మగ్గుతున్న ప్రవాసులకు న్యాయ సహాయం (లీగల్‌ ఎయిడ్‌) ఇవ్వాలని కోరారు.