నిరంతర సాధనయే విజయానికి కారణం…

బాన్సువాడ, జనవరి 29

నిజామాబాద్‌ న్యూస్‌ డాట్‌ ఇన్‌ :

ప్రతి విద్యార్థి నిరంతర సాధన దిశగా కృషి చేసినట్లయితే విజయాలు తమ దరికి చేరుతాయని వ్యక్తిత్వ వికాస నిపుణులు నక్క నవీన్‌ అన్నారు. బుధవారం సదాశివ నగర్‌ మండల కేంద్రంలోని ఆదర్శ పాఠశాలలో విద్యార్థులకు పరీక్షల పట్ల అవగాహన కార్యక్రమాన్ని నిర్వహించారు. ఈ సందర్భంగా ఆయన విద్యార్థులను ఉద్దేశించి మాట్లాడుతూ విద్యార్థులు తమ చిన్ననాటి నుండి లక్ష్యాలను ఏర్పాటు చేసుకొని దానికి అనుగుణంగా అడుగులు వేసినప్పుడే తమ లక్ష్యాల్ని నెరవేర్చుకోగలుగుతారన్నారు.

విద్యార్థులు పరీక్ష అనే భయాన్ని విడనాడి పోటీ పరీక్షల్లో తమ సత్తా తెలియజేసేందుకు కృషి చేయాలని విద్యార్థులకు సూచించారు. కార్యక్రమంలో ఆదర్శ పాఠశాల ప్రిన్సిపల్‌ రాజిరెడ్డి, ఉపాధ్యాయ బృందం విద్యార్థినీ విద్యార్థులు తదితరులు పాల్గొన్నారు.