Telangana Live Telangana Live News and Views 24X7
హైదరాబాద్‌, డిసెంబర్‌ 25
నిజామాబాద్‌ న్యూస్‌ డాట్‌ ఇన్‌ : హైకోర్టు ఆదేశాల నేపథ్యంలో కొవిడ్‌ నియంత్రణకు తెలంగాణ ప్రభుత్వం ఉత్తర్వులు జారీ చేసింది. జనవరి 2వరకు బహిరంగసభలు, ర్యాలీలపై నిషేధం విధించింది. ఇతర కార్యక్రమాల్లో మాస్కులు, భౌతిక దూరం తప్పనిసరి అని స్పష్టం చేసింది.
రాష్ట్రంలో ఒమిక్రాన్‌ తీవ్రత పెరుగుతోందని.. ప్రభుత్వ, రాజకీయ కార్యక్రమాలు, సంప్రదాయ వేడుకల్లో మాస్కులు ధరించడం వంటి కనీస జాగ్రత్తలు పాటించడం లేదని రవిచందర్‌, చిక్కుడు ప్రభాకర్‌, పవన్‌ కుమార్‌ తదితర న్యాయవాదులు హైకోర్టు దృష్టికి తీసుకొచ్చారు.
రానున్న రోజుల్లో పలు ఉత్సవాల్లో జనం భారీగా గుమిగూడే అవకాశం ఉందని కోర్టు దృష్టికి తెచ్చారు. దీనిపై స్పందించిన ధర్మాసనం వేడుకలను నియంత్రించాలని ఆదేశించింది. ఒమిక్రాన్‌ వ్యాప్తి నేపథ్యంలో క్రిస్‌మస్‌, నూతన సంవత్సర, సంక్రాంతి వేడుకలను నియంత్రించాలని రాష్ట్ర ప్రభుత్వాన్ని హైకోర్టు ఆదేశించింది.
వేడుకల్లో జనం గుమిగూడకుండా ఆంక్షలు విధిస్తూ రెండు, మూడు రోజుల్లో ఉత్తర్వులు జారీ చేయాలని ప్రభుత్వానికి ఉన్నత న్యాయస్థానం స్పష్టం చేసిన విషయం తెలిసిందే. హైకోర్టు ఆదేశాల నేపథ్యంలో ప్రభుత్వం ఇవాళ జీవో జారీ చేసింది.
