మీసేవ ద్వారా మేడారం ప్రసాదం పొందవచ్చు

కామారెడ్డి, ఫిబ్రవరి 15

నిజామాబాద్‌ న్యూస్‌ డాట్‌ ఇన్‌ : మేడారం సమ్మక్క-సారాలమ్మ ప్రసాదాన్ని మీ సేవ కేంద్రాల ద్వారా అందించనున్నారు. భక్తుల సౌకర్యార్థం రాష్ట్ర ప్రభుత్వం ఈ మేరకు ఏర్పాట్లు చేసిందని కామారెడ్డి జిల్లా మీ సేవ జిల్లా మేనేజర్‌ ప్రవీణ్‌ కుమార్‌ మంగళవారం ఒక ప్రకటనలో తెలిపారు. ప్రసాదం పొందాలనుకునేవారు సమీపంలోని మీసేవ కేంద్రాలలో రూ.225 చెల్లిస్తే కొరియర్‌ ద్వారా నేరుగా ఇంటికే అందజేస్తారని చెప్పారు.

ఇందులో 200 గ్రాముల బంగారం (బెల్లం) తో పాటు వనదేవతల ఫొటో, పసుపు, కుంకుమ ఉంటుందని తెలిపారు. భక్తులు చెల్లించే రూ.225లో ప్రసాదం ధర రూ.190, సేవ రుసుముల కింద రూ.35 తీసుకుంటారని పేర్కొన్నారు. ఈ అవకాశాన్ని జిల్లా ప్రజలు సద్వినియోగం చేసుకోవాలని కోరారు.